Nagtutugot an mga lideres kan Quad Committee kan Kamara, na bayadan an gastos sa pamasahe asin istaran ni dating Presidente Rodrigo Duterte tangani sanang mag-atender sa hearing na igwa nin koneksyon sa mga kaso nin extrajudicial killing sa saiyang war on drugs campaign.
Preparado man soboot an overall chair kan Quad Comm na si Robert Ace Barbers, asin an mga co-chairmen na si Dan Fernandez, Bienvenido “Benny” Abante Jr., asin Joseph Stephen “Caraps” Paduano, bise pamayo Romeo Acop, Senior Deputy Speaker Aurelio “Dong” Gonzales Jr., asin Deputy Speaker David “Jay-jay” Suarez tanganing dai magin ulang an gastos sa pag-atendir ni Duterte sa hearing sa Nobyembre 7.
Sa nakalihis na interview, pigsaysay ni Duterte na mayo ining gastos kaya dai siya nag-atender sa pagdangog kan Quad Comm.
An dai pag-atendir ni Duterte nakapamundo sa mga kongresista siring kan Majority Leader Manuel Jose “Mannix” M. Dalipe, House Assistant Majority Leaders Jay Khonghun kan Zambales asin Paolo Ortega kan La Union, na nagsaysay na posibleng natatakot si Duterte sa mga kahapotan kaya dai ini nag-atendir .
Sa nakalihis man na hearing, pigsaysay ni Paduano, chair kan Committee on Public Accounts na posibleng tuyo an dai pag-atender ni Duterte.
Alagad sa suminunod na surat ni Delgra, pigsaysay kaini na nagdesisyon an dating Presidente na dai na mag-atendir huli ta sinasabing dae na kaipuhan matapos an mag-appear sa hearing kan Senado asin gagamiton sana ini kan Chamber sa pag-impeach saiya.
Sinabi kan mga lider kan Quad Comm na seryoso sinda sa paghapot ki Duterte na aramon an totoo.
Segun ki Acop, an pagigin andam kan mga lider kan komitiba na maggastos sarong demonstrasyon na mawot nindang magsagibo nin hararom na imbestigasyon tangani na maaraman an totoo. Pighurot pa man ni Gonzales an importansya kan transparency.
Nagtutubod si Suarez na importante sa hearing an testimonya ni Duterte.
Sa ibong kan pauru-utro na imbitasyon, dae nakaatendir si Duterte sa Quad Comm hearing alagad nag-atendir sa hearing kan Senado sa enot na imbitasyon kaini.
