Dapat soboot suportaran kan International Criminal Court (ICC) an piggigibo kan Pilipinas na pagsisiyasat sa mga drug-related killings na nangyari sa nakalihis na administrasyon.
Nagtutubod si Solicitor General Menardo Guevarra, na kun mawot kan ICC na suportaran an Pilipinas na imbestigaran an mahewasang garadanan, dapat an international body an matabang sa nasyon asin bako an Pilipinas an matabang sa tribunal.
Anuman na ebidensiya o findings soboot na igwa an ICC, pwede kaining itao sa Pilipinas tanganing an gobyerno kan nasyon na an bahalang mag-prosecute sa siisay man na kaipuhan usigon.
Sigun sa SolGen, dae pa nagsisimbag an Pilipinas sa kamawotan kan ICC na magtabang sa sadiri kaining imbestigasyon huli sa dae man soboot obligado an nasyon na tabangan an tribunal.
Kaining nakalihis na taon, hinagad kan ICC sa Philippine government na magtabang tanganing ma-facilitate an pag-interview sa limang pangenot na personalidad sa kontrobersyal na drug war.
Pwede kuta na magtabang an Pilipinas sa paagi kan pagdadara sa sainda sa The Hague sa Netherlands o kun dae man, isasagibo na mismo an ‘interrogations’ o paghahapot sa ngaran kan ICC.
Alagad nanindugan si Guevarra na dae simbagan an request kan international body.
Soboot, pwede sindang magdagos kun mamawoton kaini alagad dae dapat laoman an tabang kan gobyerno kan Pilipinas huli ta igwang sadiring sistema an nasyon.
