Posible na mag-isyu an International Criminal Court (ICC) nin mas kadakol pang arrest warrant kontra sa co-perpetrator ni dating Presidente Rodrigo Duterte katakod sa mga paggadan sa war on drugs kan saiyang administrasyon.
Sigun sa abogado kan mga pamilya kan mga biktima kan drug war na si Atty. Joel Butuyan, igwa nin mga indikasyon na may iba pa apwera sa dating Presidente an posibleng isyuhan nin arrest warrant kun pagbabasehan an isinirbing warrant ki Duterte gikan sa International Criminal Court.
Kun saen, nakabugtak sa warrant na indirect co-perpetrator si dating Presidente Duterte.
Sinabi man kan abogado, na kabali man sa listahan kan ICC counsel, na posibleng saro si dating Philippine National Police (PNP) chief asin presenteng Senator Ronald Dela Rosa sa co-perpetrators na pwedeng masunadan nin arrest warrant sa mga masunod na aldaw.
Mientrastanto, piglalaoman man na kadakol na mga Pilipino an mapasiring sa ICC tangani mag testigo katakod man sa kaso kontra sa dating Presidente.
Kun saen bibilogon soboot an sarong counsel para sa mga biktima tangani kumatawan sa mga pamilya kan mga nagadan sa war on drugs.
