NAGA CITY – Pig-enkaminar kan sarong konsehal sa syudad nin Naga an gabos na dae paglingawan asin padagos na iurgulyo an satuyang sadiring wika.
Sa nagin patara-tara ni Naga City Councilor Joe Perez, sinaysay kaini na dae paglingawan asin padagos na gamiton an sadiring wika na nagpapahiling kan tradisyon asin pagkakabistohan kan sarong lugar.
Napakaimportante man soboot kan selebrasyon kan Buwan ng Wika huli ta digdi naiipahiling na nagkakasararo an lambang mga Pinoy asin nagkakaintindihan sa paagi kan sarong wika an Filipino.
Dugang pa kan opisyal, mas makakamarhay man soboot na Bikol man giraray an gamiton na lenggwahe sa laog kan mga establishemento orog na sa mga fast food chain.
Dakulang huma man soboot sa Bikol language an pagkakaigwa nin manlaen-laen na boot sabihon kan nagkapirang tataramon sa manlaen-laeng probinsya asin distrito.
Sigun pa ki Perez, makakatabang kuta digdi nin dakula enkaso magkakaigwa nin sadiring diksyonaryo alagad mahahaluyan pa ini asin halawig pa an magigin diskusyon dapit digdi. Ini an huli sa pagkakaiba-iba kan lambang dayalekto na piggamit sa manlaen-laeng lugar sa Bicol Region.
