Pigpatanidad ni incoming US Secretary of State Marco Rubio an China na dapat iuntok an panggugulo kaini sa Pilipinas asin Taiwan.
Sa confirmation hearing sa US Senate Foreign Relations Committee sa nomination ni Rubio komo US Secretary, pighayag kaini na an mga aksiyong ginigibo ngunyan kan China an labing nakakaraot, pinupuwersa soboot kaini an Amerika na maggibo nin counteractions nin huli t ta igwa nin commitments sa Pilipinas siringman sa Taiwan na sainda man soboot ipapadagos.
Sigun pa sa Republican Senator na kun mawot kan China na maggibo nin paagi tanganing magin matatag an relasyon kan Estados Unidos asin China, dapat soboot kaining iuntok an panggugulo sa Taiwan asin Pilipinas nin huli ta pigpipirit kaining ipokus an saindang atensiyon sa mga paaging dae ninda mawot gibuhon.
Pigpatanid pa ni Rubio na dakula an magigin epekto sa entirong kinaban enkaso magkaigwa nin anuman na miscommunication o inadvertent conflict sa pangdadahas kan China sa disputed waters, na mag-busol sa Estados Unidos tanganing depensaran an Pinas komo treaty ally o kaalyado kaini.
An pahayag ni Rubio an sa tahaw kan panibagong development sa West Philippine Sea kun saen padagos an saindang iligal na deployment nin dambuhalang barko kan China sa katubigan kan Pilipinas harani sa Zambales na pighalimbawa ni Rubio komo harassment.
Si US Sen. Rubio an pigtalaga ni US President-elect Donald Trump na mamayo sa State Department asin magigin successor ni outgoing Secretary of State Anthony Blinken.
Mientrastanto, nagtutubod man si Rubio na importante na pakusugon pa an koordinasyon kan Pilipinas asin Estados Unidos.
