Mas nagluya pa an naikurit na inflation rate o pangkabilogang parekas kan presyo kan mga barakalon asin serbisyo sa nasyon kan nakalihis na Hulyo.
Sa sarong press conference kasuodma, Martes, Agosto 5, ipigreport kan Philippine Statistic Authority (PSA) USec.asin National Statistician Dennis Mapa na nagluya sa 0.9% an inflation rate kan nakalihis na bulan, an pinakamaluya na naikurit ngunyan na taon.
Kun ikukumparar kan nakalihis na Hunyo 2025, ini an 1.4% na mas maluya asin hababa man sa 2% hasta 4% na target kan economic managers.
Paliwanag kan PSA official na an mas maluya na inflation kan nakalihis na Hulyo an dara kan mas maluya na paglangkaw kan presyo kan pagkakan asin non-alcoholic beverages siring man kan utility costs.
Padagos man an pagbaba kan inflation ngunyan na taon sa tahaw kan pagbaba kan mga presyo sa bagas.
Ipinaliwanag man kan PSA Chief na alagad maski nahilingan nin pagbaba sa mga presyo kan bagas kun saen nakatabang an programang bente pesos na bagas kan gobyerno, igwang mga paglangkaw man sa ibang mga items o barakalon partikularmente na an paglangkaw kan presyo kan kada kilo kan orig huli sa problema sa suplay dara kan African Swine Fever (ASF) siring man sa presyo kan manok asinsira na nagigin substitute sa orig.
Sa gulay man, nagkaigwa nin paglangkaw huli sa epekto kan magkakasunod na bagyo asin habagat na nagtama kan nakalihis na bulan.
