NAGA CITY-Dae pa fully restored an Internet connection sa probinsya nin Camarines Sur makalihis an panlalamsa kan Bagyong Uwan.
Sa entrevista kan Bombo Radyo Naga ki Engr. Clint Vincent Gregorio (Free Wifi Project Focal, Dict Camarines Sur), sinasyay kaini na huli sa pagkawara nin suplay nin kuryente, kadaklan man sa mga free wifi sites sa probinsya an talagang apektado man.
Sigun ki Gregorio, sa presenteng datos kan Casureco, 91% na mga Brgys sa probinsya an power restored na kaya man padikit-dikit pigbabalik na man ninda an mga internet connection.
An mga ahensya na responsable sa pagbalik kan mga ini, iyo an NTC asin iba pang mga Telco Partners, siring kan PLDT, Converge, Globe.
Alagad igwa nin mga lugar na dawa naibalik na an mga suplay nin kuryente, an internet connection an down pa man giraray huli ta an main cable an naraot kan nakalihis na bagyo.
May mga internet provider pa man an ongoing pa an trouble shooting siring man replacement kan mga naraot na kagamitan.
Sa ibong na lado, an mga lugar na hararani sa central part kan CamSur, siring kan Naga asin Camaligan an pakarhay na an mga signal alagad bakong arog kakusog kumparar kan dati.
Padikit dikit pa sanang naibabalik liwat an inaapod na signal strength kan kanya-kanyang Telco sites.
Sigun ki Gregorio, nagpapadagos an pag provide ninda nin internet connection na kun saen pigtawan duon kaini na makusog an internet connection enkaso pakarhay man an mga signal.
Sa ngunyan, tangani na magin fully restored na an nasambitan ng Internet connection sa probinsya, kinakaipuhan na maisaaayos an Fiber Optic Connection, maibalik an suplay kan kuryente sa mga lugar, asin an maiaabot ninda an mga GIDA sites o an Geographically Isolated and Disadvantaged Areas, an mga komunidad na may mga marginalized populations na pisikal asin sosyo-ekonomikong suhay sa mayor na sosyedad.
