NAGA CITY- Padago na nahahampang an National Food Authority (NFA) Camarines Sur sa kakulangan nin espasyo para sa mga bagas asin paroy.
Sa entrevista kan Bombo Radyo Naga ki Jenelyn Celestial Acting Branch Manager, NFA Camarines Sur, sinaysay kaini na pano na an saindang mga bodega asin naghahanap na sinda nin dugang na storage tanganing maakomodar an bagong ani.
Katakod kaini, tanganing mabawasan an espasyo nag-implementar na nin aksyon an NFA siring kan milling operations asin distribusyon nin bagas sa mga vulnerable sectors sa paagi kan programang benteng bagas tanganing mabawasan an nakaimbak na bagas sa saindang mga warehouse.
Sigun ki Celestial, nagpakol na sa 494,000 sako nin paroy, mantang 46,000 sako nin bagas an nakatambak.
Paliwanag pa kan opisyal, nin huli ta nasa limitasyon na an kapasidad kan presenteng mga pasilidad, dae na makakatipon nin dugang na supplies an NFA kun kaya pig-eenkaminar ninda an mga lokal na gobierno asin kooperatiba na magtabang sa paghanap nin mga espasyo na pwedeng arkilahon.
Mientrastanto, padagos man an pagtugdok nin bagong bodega sa Libmanan asin an pagpakarhay kan mga pasilidad digde tanganing masimbagan an problema.
Apwera digde, saro pa sa piglalaoman na solusyon sa nasambitan ng angat iyo an planong pagtugdok nin bagong bodega sa Cabusao, na sa ngunyan hinahalat na sana ining aprubahan.
Sa ngunyan, target kan ahensiya na matapos an bagong bodega sa enot na quarter kan 2026 tanganing tolos ining makapag-operate.
