Nagpahayag nin buong kumpiyansa an Kamara de Representantes na magagampanan kan Senado an duwa na importanteng tungkulin komo Impeachment Court asin komo mga mambabatas—na dae naaantala an pagpapadagos kan legislative agenda kan Kongreso.
Sa sarong pahayag na ipinaluwas kan Kamara, sinabi kaini na an lower house nagtutubod na an Senado igwa nin kapasidad na balansehon an pagdangog kan mga impeachment proceedings asin an pag-orolay kan mga bills na importante sa nasyon.
Sinabi kan Kamara na preparado sindang makipagtabangan sa Senado sa pamamayo ni Senate President Sherwin Gatchalian nganing maseguro an marahay na pagproseso kan mga natatadang prayoridad na lakdang. Kabali digdi an pagpapadagos kan mga bicameral conference committees asin technical working groups sa katuyuhan na pagsararoon an manlaen-laen na bersyon kan mga bill hale sa duwang kamara.
Tinawan duon kan Kamara an importansya kan padagos na koordinasyon asin kooperasyon kan Senado asin kan Kamara tanganing maparikas an pagpasar kan mga bills na makakasimbag sa presenteng pangangaipo kan mga Pilipino asin masuportahan an padagos na pag-uswag kan ekonomiya asin iba pang sektor.
Naglalaom man an Kamara na magdadanay an makusog na relasyon kan duwang kamara ngani na mamantenir an momentum kan legislative agenda asin maisulong an piglalaoman na mga reporma kan publiko.
Pig-asegurar kan Kamara na an pinaka-importanteng katuyuhan kan Kongreso bako an interes kan arin man na sarong Kamara, kundi an pagpasar nin mga makahulugan na ley na mapagian kan buhay kan mga Pilipino, mapakusog kan ekonomiya, asin mapauswag an halawig na pag-uswag kan nasyon.
