Tatagamahan nin pondo kan banwaan nin Pili Camsur an mga senior citizen na dai nakakaayon sa social pension.
Sa intrevista kan Bombo Radyo Naga ki Mayor Marivic Solano, alkalde kan banwaan nin Pili, bakong gabos na senior citizens nakakabali sa listahan kan mga nagriresiber nin pension na gikan sa national government huli sa limitado an pondong ibinababa kan gobyerno sa lambang lugar.
Nagkapirang mga senior citizen naman an nagdulok sa saiyang opisina tanganing maghagad nin tabang na makabali man sa lista alagad dawa na ngani kamawotan man kan opisyal na matabangan an mga ini, mayo man ining maginibo huli ta dai man ibinababa sa LGU an pondo para digdi.
Paliwanag kan alkalde, gikan sa national government an podo kaini asin maging an listahan kan mga nakakalaog sa programa bako man gikan sa LGU kaya dai dapat na pagbasulon an mga opisyales kan lokal na gobyerno asin Barangay huli ta gikan ini sa national government.
Huli digdi, pigsierto kan alkalde na antes na matapos an taong 2026, tatagamahan kaini nin pondo an mga senior citizens na dai nakakabali sa social pension tanganing mailaog sa masunod na taon.
Mientrastanto, sigon pa sa alkalde, kaipuhan na tawan man nin importansya an mga senior citizens huli ta dakula an ambag kan mga ini sa satuyang nasyon kan sinda makukusog pa.
Pangapodan na sana kan opisyal na maghalat halat sana huli ta dawa kadikit, iiskusaron kaining matabangan an mga senior citizen sa paagi kan saiyang inisyatiba.
