NAGA CITY – Liwat naobserbaran an bahagyang paglangkaw kan kaso kan COVID-19 sa nasyon.
Sa datos kan Department of Health puon Mayo 7 hasta 13, nakapagrehistro an ahensiya nin 877 na bagong COVID-19 cases sa bilog na nasyon kun sain nasa 125 an average na kaso an naiirehistro urualdaw.
Igwa man nin naireport na naulakitan kan helang na binawian nin buhay puon kan Abril 30 hasta Mayo 13.
Alagad, piglinaw naman kan ahensya na nagtitinir man na low risk sa helang an gabos na rehiyon sa nasyon.
Sa ibong kan nanotarang paglangkaw sa kaso kaini tinawan duon man kan ahensya na baku pa ining bastanteng rason tanganing magkaigwa nin paghihigot sa mga pagbyahe sa anuman na nasyon.
Katakod kaini, nagpagirumdom an ahensya na boluntad na asin maggamit na nin facemask kabali na an paghugas nin kamot tanganing malikayan na maulakitan kan helang.
Marurumduman, siring man an nagin pagirumdom ni Sagñay Mayor Jovi Fuentebella makalihis na magpositibo sa nasambitan ng helang kan nakalihis pa sanang semana.
