NAGA CITY- Dinismiss kan Provincial Prosecutor’s Office an kasong isinangat kan Criminal Investigation and Detection Group (CIDG) laban sa haros 60 persona na naarestar sa pigkondusir na raid sa sarong bulangan sa Camaligan, Camarines Sur.
Ini an kinumpirmar ni PC/Insp. Ronnie Fabia, provincial head kan CIDG-Camarines Sur sa entrevista kan Bombo Radyo Naga.
Basado sa desisyon kan korte, kinonsiderar kaining legal an permit na kapot kan administrator kan Camaligan Sports Complex kaya mayo suboot nahiling na probable cause sa kasong isinangat kan CIDG-Camarines Sur laban sa naarestar na indibidwal.
Sigon ki Fabia, pigpipreparar na kan saindang opisina an maninigong mga dokomento para sa isasangat na motion for reconsideration katakod kan nasambitang desisyon.
Sa oras na madeny suboot kan korte an isusumiter nindang motion plano nindang magsunad nin petition to review sa higher office kaini.
Tinawan doon ni Fabia na nakaandam an saindang opisina na atubangon an anuman na kasong isasangat laban sa sainda kan narestar na mga indibidwal.
Marurumduman na niraid kan mga kapulisan an nasambitang bulangan sa barangay San Roque makalihis na makaresibe nin impormasyon na dae suboot sa tamang proseso an operasyon kaini.
