NAGA CITY- Kanselado na an klase sa mga eskwelahan sa probinsya nin Camarines Sur katakod kan ikokondusir na nationwide transport strike sa Lunes.
Basado sa ipinaluwas na kasuguan ni Gov. Migz Villafuerte, suspendido an klase sa gabos na lebel sa pampubliko asin pribadong eskwelahan sa bilog na probinsya.
Napag-araman na mapartisipar sa nasambitang untok-pasada an mga jeepney transport groups hale sa Pasacao, Libmanan, San Fernando asin Pamplona.
Mientrastanto, basado man sa dokomento na ipinaluwas ni Naga City Mayor John Bongat mayong kanselasyon sa klase sa mga eskwelahan asin trabaho sa mga opisina sa gobyerno sa Lunes, Disyembre 4 asin Martes, Disyembre 5.
Sa pag-orolay na pigkondusir suboot sa Naga City People’s Council Office, nagpahayag an mga organisasyon nin pampasaherong jeep asin iba pang pampublikong bihikulo sa ciudad na dae an mga ini mapartisipar sa nasambitang transport strike na pig-organisar kan Condor-Piston Bicol.
