Nakatalaan na makipag-olay an Criminal Investigation Detection Group (CIDG) sa opisyal kan Philippine Amusement and Gaming Corporation (PAGCOR) na si Raul Villanueva ngunyan na semana para pag-olayan an alegasyon kan soboot pakisumaro kan sarong hepe kan Philippine National Police (PNP) sa tinanggal na Bamban, Tarlac alcalde Alice Guo.
Sa Pahayag kan tagapagtaram kan PNP na si Police Colonel Jean Fajardo na an CIDG, an grupong nakadestino na mag-imbestigar kan akusasyon, makikipag-olay ki Villanueva “tanganing malinaw an isyung ini nin sarong bes asin para sa gabos.”
Kan Martes, si Villanueva, an retiradong heneral asin dating commanding officer kan Intelligence Service of the Armed Forces of the Philippines (ISAFP), ipinahayag na sarong dating hepe kan PNP an soboot nagtabang ki Guo na makaluwas sa nasyon. Sinaysay kaini na an dating opisyal kan pulis parte man kan “monthly payroll” ni Guo.
Sa ngunyan, pig-anunsyar kan PNP na pig-iimbestigaran ninda an 24 sa mga dating lideres kaini katakod sa mga alegasyon na saro sa mga ini an nagtabang ki Guo na makadulag sa Pilipinas karibay nin dakulang kantidad nin kwarta.
An PNP igwa nin 30 hepe kabali an presenteng hepe kaini na si Police General Rommel Marbil. Sa 29 dating hepe kan PNP, lima na an binawian nin buhay, kaya 24 na sana an natatadang pangaran.
