Nakatalaan na maglaog na sa military an South Korean singer-actor na si Rowoon para sa mandatory service sa bulan nin Hulyo.
Pigkumpirmar ini kan saiyang management company kun saen pigsaysay na an saiyang enlistment an nakatalaan sa July 21.
An 28-anyos na Korean star na sa totoong buhay an bistado komo si Kim Seok-woo an malaog sa training center asin gampanan an saiyang military komo aktibong soldados sa Army.
Marurumduman, sa irarom kan batas na nag-iiral sa South Korea, an mga kalalakihan orog na an mga mayong kakundian o helang an kaipuhan na gampanan an saindang military service sa laog nin maski 18 bulan.
Si Rowoon an nag-debut kan taong 2016 komo miyembro kan K-pop boy group na SF9 antes na magbalyo asin mag-focus sa acting makalihis na maghali sa banda kan taong 2023.
Pinuonan kaini an saiyang acting career komo supporting role sa teen drama na School 2017 asin piggampanan an lead role sa series siring kan Extraordinary You, “She Would Never Know, “The King’s Affection” asin”Destined With You.”
Sa ngunyan, excited an mga fans kan actor sa mga proyekto na gigubuhon pa kaini sa mga masunod na panahon.
