Naka-preposition na an labi 1.4 million family food packs (FFPs) sa Western Visayas, Central Visayas asin karatig na rehiyon tanganing ipanao sa mga pamilyang apektado kan pagsabog kan Bulkang Kanlaon kan nakalihis na Lunes, Disyembre 9.
Pigsierto ni Department of Social Welfare and Development Sec. Rex Gatchalian na igwang bastanteng suplay kan FFPs.
Sinierto man kan sekretaryo na preparado na magtugon an DSWD sa mga maebakwar na residente asin an gabos na klase nin tabang an makaabot sa sainda sa orog na madaling panahon.
Pigsugo man kaini an iba pang DSWD field offices na magin full alert asin magpreparar sa augmentation kun kinakaipuhan.Apwera sa FPPs, sinaysay ni Sec. Gatchalian na nag-preposition na man an ahensiya nin mga non-food items siring kan kitchen kits, family kits, sleeping kits, hygiene kits, asin laminated sacks sa iba pang relief items.
Igwa man soboot stockpile asin standby funds na nakapreparar para sa augmentation support sa mga lokal na gobyerno na pwedeng maapektaran kan pagsabog kan bulkang Kanlaon.
Pig-enkaminar man ni Sec. Gatchalian an mga haraning komunidad, partikular an mga nag-iistar sa laog in 6 kilomoter radius nin summit kan Mt. Kanlaon na sunudon an mga emergency evacuation notice kan saindang LGU.
