NAGA CITY- Pigkasa kan Iriga City Police Station an sarong operasyon ngunyan na aldaw sa harong kan suspek na binistong si alyas “lea”, 48-anyos asin residente kan Brgy. Sta. Cruz Sur, Iriga City.
Sigun ki PLTCOL. Jeric Don P. Sadia, OIC kan Iriga City Police Station, an nasambitan ng kalakawan an sa bisa kan Search Warrant Operation para sa pagbalgar sa RA 9165.
Katakod digde, nakumpiskar ki alyas Lea an apat na pidaso kan heat-sealed transparent plastic sachets na igwang laog kan pinagtutubudang shabu na pigkakarkulong nasa poco mas o menos 15 gramo na nagkakantedad man nin P102,000.
Apwera digde, nakua pa sa disposisyon kan suspek an mga paraphernalia na gamit sa ilegal na droga.
Mientrastanto, an nasambitan ng operasyon an huli sa mas pinahigot na kampanya kontra sa illegal na droga kan PNP-Iriga sa pakikipag-koordinar sa PDEA R5.
Sa ngunyan, nasa kostodiya na kan Iriga City Police Station an suspek asin mahahampang sa magkakanigong disposisyon.
