NAGA CITY – Pigluwas na kan Department of Agriculture an Final Bulletin dapit sa El Nino Phenomenon na enot na nanlamasa sa bilong na nasyon puon kan huring parte kan 2023 hasta sa enot na parte kan 2024.
Basado sa Final Bulletin, nagpakol sa P15.30 billion an natukoy na danyos sa kabilugang pag-iral kan El Niño kun saen naapektaran an kabilugang 333,195 na mga paraoma asin parasisira.
Nagpakol man sa 270,855 hectares kan mga agricultural areas an nahilingan nin danyos mantang an production loss an nagpakol sa kabilugang 784,344 MT.Ini an pigbibilog kan 330,717 Metric Tons (MT) nin paroy, 327,310 MT kan mais, 112,681 MT nin mga high value crop, asin 2,320 MT kan cassava o kamoteng kahoy.
Sa mga paruyan, nagpakol sa 109,481 ektarya an naapektaran gikan sa kabilugang natanuman na 2,137,046.77 hectares.
Sa mga maisan man, nagpakol sa 131,787 hectares an natukoy na naapektaran. Ini an katampad kan 11.96% kan natanuman na 1,101,695.90 hectares.
Sigun sa DA, nakaapektar an El Niño sa kabilugang target production kan Pilipinas sa gabos kan industriya. Nakapalaman pa sa report kan ahensiya na nagibo kaining makapagpaluwas nin hasta P14.54 billion na tabang para sa mga naapektarang parasisira asin paraoma.
Sa irarom kan nasambitan ng kantedad, P8.59 billion an gikan sa Rice Farmers Financial Assistance (RFFA), P4.72 billion an sa paagi kan production support sa paaagi kan mga regional offices kaini, P659.17 million an sa paagi kan mga inputs, asin an natatada sa paagi kan crop insurance, loan, pigtao na hayop, asin iba pa.
Natukoy an nasambitan ng danyos gikan sa mga rehiyon kan Cordillera Administrative Region (CAR), Ilocos Region, Cagayan Valley, Central Luzon, Calabarzon, MIMAROPA, Bicol Region, Western Visayas, Central Visayas, Eastern Visayas, Zamboanga Peninsula, Central Mindanao, Davao Region, Soccsksargen asin Caraga Region.
