NAGA CITY- Nagpakol sa labi P22 million na kantedad kan iligal na droga an nasamsam asin nasa 125 drug suspects an naarestrar sa pigkundusir na anti-illegal drugs operations kan nakalihis na bulan nin August, sigun sa Police Regional Office Bicol.
Sigun ki PRO-5 director BGen. Nestor Babagay Jr. nag-abot man sa P3,358.337 grams kan shabu asin 61.1 grams kan marijuana an nakumpiskar sa laog kan nasa 155 operations na pigkundusir sa bilog na Rehiyon.
An nasambitan ng operasyon an nagresulta sa pagkakaarestrar kan nasa 125 drug violators, lima digde an pig-identify komo high-value individuals (HVIs), mantang an 120 an pigkokonsederar na street-level pushers asin users.
Katakod digde, an probinsiya nin Camarines Norte an nakapagkurit nin pinakahalangkaw na confiscated drugs na nagkakantedad nin nasa P16.1 million, pigsundan kan Camarines Sur na igwang P4.8 million, Naga City na igwang P675,694, Catanduanes na igwang P554,200, Albay na igwang P291,924, Masbate, P263,840; asin Sorsogon, na P48,620.
Mientrastanto, liwat man na pigsierto kan hepatura na padagos an saindang ginigibong mga lakdang tanganing dagusan ang mapuho an iligal na droga sa Rehiyon orog na ngunyan na padagos an saindang gingigibong mga operasyon.
