NAGA CITY- Gadan na kan madukayan an lawas kan sarong lalaki sa Lucban, Quezon. Binisto an biktima na si alyas Luis, 51-anyos residente kan Sitio Gitna, Brgy Atulinao Lucban, Quezon.
Sa nagunong impormasyon kan Bombo Radyo Naga sa Quezon Police Provincial Office, napag-araman na mantang may pigsasagibong family gathering sa harong na pagsasadiri kan tugang kan biktima na binistong si alyas Mario kan nakalihis na April 22, 2024 kan magpa-aram na mapuli na si alyas Luis.
Alagad kinaagahan kan April 23, 2024, nahiling na sana an mayo ng buhay na lawas kan biktima kan saiyang sadiring tugang na si alyas Mario sa maduot na parte harani sa harong kaini.
Sa inisyal na imbestigasyon kan mga otoridad, napag-araman na an biktima an igwang pigsasapong helang na hypertension asin nakaeksperyensiya na nin heart attacked kan taong 2023.
Sa ngunyan, nagpapadagos pa an imbestigasyon kan mga kapulisan dapit sa nasambitan ng insidente.
