Pig-iimbestigaran na sa presente kan Office of the Ombudsman an nagkapira pang mga imbwelto sa isyu kan korapsyon sa flood control projects.
Sigun mismo ki Ombudsman Jesus Crispin ‘Boying’ Remulla, pigbali na sa imbestigasyon an mga ‘losing bidders’ o an mga kontratistang dae nakakua asin nadaog sa bidding kan mga proyekto.
Ini makalihis na makaulay ni Remulla an pirang mga opisyal kan Philippine Competition Commission sa nareseber kaining impormasyon na kaibahan magin an‘losing bidders’ sa nakinabang sa anomalya.
Mientrastanto, pigheras ni Ombudsman Remulla na igwang natukdong indibidwal an komisyon kun saen permi ining parte kan losing bidders.
Pigpaliwanag ni Ombudsman Remulla kun pano nakinabang an mga losing bidders sa kada proyekto kan gobyerno para sa flood control.
Kun saen 3% gikan sa bilog na project cost an porsyento soboot kan mga ini o narereseber na nagin kultura na man sa Department of Public Works and Highways.
Boot sabihon, kun an proyekto nagkakantidad nin sarong milyon piso, 3% gikan digdi o 3-milyon piso an magigin parte asin marereseber kan losing bidders.
Mantang pigsiwalat man ni Remulla na an pondo kan proyekto bako sanang napapakinabangan kan mga opisyal kundi nag-abot pa soboot hasta pati sa janitor kan ahensiya.
Sa ibong kaini, pighayag ni Ombudsman Boying Remulla na an sisay man parte kan ‘losing bidders’ pwedeng magrani sa opisina katakod sa nagpapadagos na imbestigasyon sa flood control projects anomaly.
Bukas soboot an ahensiya para sa sainda kun enkaso mawot magbuyagyag kan saindang naaaraman asin itukdo pati an kaibahan pang mga imbwelto.
