Inimpound na kan Land Transportation Office (LTO) kan Porsche 918 Spyder na rehistrado sa aktor na si Derek Ramsay pagkatapos na ini makua na naggagamit nin dai awtorisadong plaka.
Segun ki LTO Assistant Secretary Markus Lacanilao, personal niyang nahiling an luxury sports car sa EDSA na may plakang “AJV 0918.”
Sa beripikasyon kan LTO, napag-araman na mayo ining eksistidong plaka sa sarong Porsche sa Pilipinas.
Nagluluwas sa imbestigasyon na si Ramsay an rehistradong kagsadiri kan behikulo, mantang si Anthony Jude “AJ” Violago (sarong amigo kan aktor) an nagmamaneho kan mahiling ini kan mga awtoridad.
Si Ramsay asin Violago nag-atubang sa LTO kasuodma makalihis na makaresibe nin show-cause order.
Pig-eksplikar ni Ramsay na yaon siya sa abroad kan mangyari an insidente asin nawalat niya an behikulo ki Violago mantang pig-uulayan an posibleng pagpabakal.
Sigon ki Violago, ikinabit niya an custom plate na may initials kaini para magamit sa sarong event an vehiculo. Sinabi man kaini na dai niya aram na ilegal ini.
Nin huli an mga dokumento para sa pagbalyo kan pagsasadiri asin dai awtorisadong plaka, enot na kinumpiskar kan LTO an lisensya sa pagmaneho ni Violago asin pig-impound an Porsche.
Magdadanay sa kustodiya kan LTO an behikulo mantang pighahalat an pormal na hearing asin an desisyon kan ahensya sa kaso.
