NAGA CITY– Makalihis an haros sarong semana na lapagan kan mga kasuldadusan asin mga rebeldeng New people’s Army (NPA) sa Sitio Pilipit, Brgy Umiray, General Nakar, Quezon, liwat na naman na nagbakbakan an mga ini.
An nasambitan ng engkwentro an may koneksyon sa nangyaring engkwentro kan nakaaging Mayo 14 kunsaen sarong suldados an nagadan mantang duwang rebelde naman an naaresto.
Sa entrevista kan Bombo Radyo Naga ki Capt. Patrick Jay Retumban, chief kan Division Public Affairs Office (DPAO) kan 2nd Infantry Division, Philippine Army (PA), sinaysay kaini na makalihis an enot na engkwentro, mas pinahigot soboot kan mga kasuldadusan an pagbabantay sa nasambitan ng barangay na bistado komo balwarte kan mga rebelde.
Katakod kaini, naghaloy nin haros 20 minuto an bakbakan kan tropa kan 202nd Brigade asin kan kinakarkulong nasa 15 mga miembro kan rebelde.
Sigon ki Retumban, mayo man nin nairidu sa linyada kan kasuldadusan alagad sierto soboot na igwa nin mga iridu sa parte kan mga NPA huli sa mga dugo na nawalat sa encounter site.
Mientrastanto, narekober soboot sa lugar an sako-sakong bagas na pigtutubudang pagsasadiri kan mga nagdurulag na rebelde.
