NAGA CITY– Urulay-ulayan man giraray ngunian sa syudad nin Naga asin sa social media an pigibong noise barrage kan tolong Catholic Schools sa syudad kasubagong udto.
Agaw-atensyon sa nasambitan ng aktibidad an mga placards na bitbit kan mga estudyante na imbes na mga linya nin pambabatikos sa gobyerno, mga hugot lines an nakasulat.
Kabale na digdi an mga tataramon na “Sa pag-ibig lang pwede ang patay na patay sa’yo,” “Hindi mo kinagwapo ang pagiging killer mo” asin kadakol pang iba.
Igwa man nin “Huwag mahihiyang magtanong kung may right to life ba kayo” na gikan sa sikat na jingle kan brand nin bulong.
Pigbalehan an noise barrage kan mga estudyante gikan sa Naga Parochial School, Universidad de Sta. Isabel, Ateneo de Naga University asin an mga seminarian na gikan sa Holy Rosary Major Seminary.
Nagmartsa sa mga tinampo an mga kabale sa aktibidad na igwang dara-darang manlaen laen na bagay na nagkawsa nin ribok arug kan megaphone, tambol, takop nin kaldero asin pito.
Obheto kan nasambitan ng aktibidad na ipaabot sa gobyerno an saindang pagkontra sa pagbuhay liwat kan death penalty.
