Pig-inkaminar kan Malacañang si Batangas 1st District Rep. Leandro Leviste na makipag-ulay ki Presidente Ferdinand Marcos Jr., tangani ibuyagyag an gabos nin impormasyon dapit sa maanomalyang flood control projects, makalihis soboot porbaran ining suhulan kan sarong Department of Public Works and Highways o DPWH district engineer.
Sigun ki Palace Press Officer Usec. Claire Castro, dakulang tabang an impormasyon ni Leviste tangani mabisto an mas darakulang pangaran asin kontratista na posibleng nasa likod kan katiwalian.
Dugang pa ni Castro, dae sana dapat papanimbagon an district engineer kundi pati man an mga nasa likod kan operasyon na dawa sadit an nagin papel, may paninimbagan pa man.
Simbag man ini kan Palasyo sa pahayag Senador Panfilo Lacson na darakulang kontratista an utak kan panunuhol asin ginagamit sana na “bagman” an mga district engineer.
Sa ngunyan, hinahalat kan Palasyo an itatao na impormasyon ni Leviste tangani puonan an mas hararom na imbestigasyon asin dagusang mabuwag an mga sindikatong kumikita sa mga proyektong para dapat sa publiko.
