NAGA CITY – Aminado an Municipal Agricultural Office (MAO)- Sipocot na bakong bastante an saindang supply kan bagas.
Sa entrevista kan Bombo Radyo Naga ki Engr. Franco Caesar Leonardo, Municipal Agriculturist / Designated Municipal Agricultural & Biosystems Engineer kan LGU Sipocot, sinaysay kaini na bako sindang rice-sufficient nin huli ta sa 24,000 ektarya kan banwaan, an irigasyon sana digdi hababa pa sa 800 ektarya.
Huli digdi, dae soboot kayang pakakanon kan mga rice farmers an gabos nin residente kan banwaan.
Katakod kaini, nag-aangkat pa man sinda nin bagas gikan sa kataraid na banwaan siring na sana kan banwaan nin Libmanan.
Sa ibong kaini, pigtawan-duon man ni Leonardo na dae nagpapabaya an saindang opisina, kun saen kan 2024 sana nasa 200 milyon na programa asin proyekto an saindang naipalaog.
Apwera pa digdi, katuwang an Department of Agriculture, rice program an pinakadakulang programa na saindang naginibuhan kun saen, nagheras sinda nin fertilizer discount voucher, P5,000, asin magin an mga insurance sa Philippine Crop Insurance Corporation.
Mientrastanto, padagos man an pag-enkaminar kan opisyal sa paraoma kan banwaan na iparehistro an saindang mga tinanom orog na ta nagkakaeskperyensiya an nasyon nin mararaot na panahon partikulemente na an pag-uran.
