Inapod ni Senator Rodante Marcoleta si Orly Guteza komo “most credible witness” na inilantad kan Senate Blue Ribbon Committee na saiyang dating pinamayuhan huli ta ini sana an nagtuloy asin nagkonektar kina dating Ako Bicol Party-list Representative Zaldy Co asin dating House Speaker Martin Romualdez.
Sa saiyang speech sa INC rally sa Quirino Grandstand, pinasaringan ni Marcoleta an mga nag-akusar ki Guteza na peke an notaryo sa saiyang testimonya sa Senado.
Piggagamit soboot ining rason tanganing ilhis an tunay na pigtutumbok kan testimonya ni Guteza.
Liwat man na pigdepensaran kan Senador an mga-agom na Curlee asin Sara Discaya na soboot nagkusang pangaranan an nasa likod kan maanomaliyang public infrastructure projects na nagbugtak sa saindang kasalbaduhan asin pamilya sa peligro.
Alagad, pigporbaran soboot ni dating Justice Secretary Jesus Crispin Remulla na pugolang maiiba an mga Discaya sa Witness Protection Program (WPP) sa paagi kan pag-demand sa sainda na ibalik an mga hinabon na kwarta.
Alagad hurot kan Senador na dae ninda kaipuhang mag-comply sa nasambitan ng requirement sa proseso pa sana kan aplikasyon tanganing mapauba sa programa huli ta dae ini nakasaysay sa ley.
Saro soboot ining paagi tanganing dae maipautob an transparency. Binanatan man ni Marcoleta an mga nagsasabing artificial intelligence (AI) sana an video na iniluwas ni Co.
Hirit ni Marcoleta, pano magigin AI an video gayong nagluwas ini sa official page kan dating lehislador.
Siring man, binatikos ni Marcoleta an pagpataw kan Ombudsman kan dae angkop na requirements siring kan pagpapapuli ki Co tanganing panumpaan an saiyang video statement kun saen isiniwalat kaining ipinagsugo soboot ni Presidente Ferdinand Marcos Jr an pagsingit kan P100 bilyon kantidad sa 2025 national budget.
Saysay pa ni Marcoleta, sa charter kan Ombudsman, pwedeng magsunad nin reklamo sa anuman na paagi, maski na dae pa nagpapabisto.
Binatikos man ni Marcoleta an Independent Commission for Infrastructure (ICI) huli sa dae pagsasapubliko sa saindang mga pagdangog.
Inapod man kan Senador an soboot P1 trilyong pondo na nakulimbat sa kaban kan bayan komo posibleng pinakadakulang panghahabon sa historya kan Pilipinas.
Kaya kaipuhan soboot talaga an transparency asin accountability tanganing malantad an mga utak kan korapsiyon huli ta kun dae sinda mapapanimbag, maski nuarin dae magkakaigwa nin hustisya an nasyon.
