Nakapagrehistro an Philippine Institute of Volcanology and Seismology (PHIVOLCS) nin padagos na strombolian activity asin short-lived lava fountaining sa Mayon Volcano kasubagong aga, Marso 16, 2026.
An aktibidad nagpoon mga alas 3:32 nin aga asin naglawig sagkod alas 7:10 nin aga.
An aktibidad kan Strombolian sarong maluya sagkod katamtaman na pagputok nin bulkan na kun saen an sarong bulkan padagos na nagbubuga nin mainit na lava, mahibog na aso, asin iba pang materyales na bulkan.
Basado sa record kan PHIVOLCS, ika-70 ng aldaw na ini kan padagos na pag-alburuto sa Mayon poon kan itaas ini sa Alert Level 3.
Segun sa ahensya, nagbubulos pa an lava asin pyroclastic density currents (PDCs) o currents, kabali na an mga rockfall events kun saen an darakulang pidaso nin solidified lava nahuhulog hale sa summit kan bulkan pasiring sa manlaen-laen na gullies.
Huli digdi, mantenidong mahigot na ipinagbabawal an paglaog sa 6-kilometer na Permanent Danger Zone (PDZ) kan bulkan.
Sa pinakahuring report kan PHIVOLCS ngonian na semana, sobra sa 150 na linog nin bulkan asin apat na pangyayari nin pagbagsak nin lava an naitala man poon Marso 10-15, na nagpapahiling nin padagos na aktibidad kan bulkan.
Mantinidong nakaalerto an mga lokal na awtoridad sa Albay asin preparado an mga evacuation centers enkaso maggrabe pa an sitwasyon.
