NAGA CITY- Padagos na nakamonitor an MDRRMO Sagñay sa mga landslide asin flood prone area huli sa pag-uuran na naeksperyensiyahan sa lugar.
Sa entrevista kan Bombo Radyo Naga ki Noli Pielago, MDRRMO Officer kan Sagñay, sinaysay kaini na mandated an gabos na barangay officials na mag-monitor sa mga low lying areas asin landslide prone area tuyong igwang pag-uuran na namamatean.
Sigun pa ki Pielago, passable man an mga tinampo para sa mga biyahero nin huli ta parteng Albay naman an nairehistrong nagrasay na daga na sa ngunyan an clear naman.
Apwera digde, sa presente mayo pa man nakabanderang no sail policy para sa mga parasisira alagad nakamonitor an MDRRMO Sagñay sa kamugtakan kan panahon orog na sa kamugtakan kan dagat.
Kasabay digde, pigsierto man ni Pielago na igwang nakaantabay na responder na preparado sa panahon kan emerhensiya.
Sa ngunyan, pig-abisuhan nasa kan opisyal an publiko na pirmeng magdangog sa mga abiso orog na sa kamugtakan kan panahon tanganing malikayan an anuman na insidente.
