Ipinroklama na si media executive at negosyanteng si Elmer Catulpos bilang bagong kinatawan ng 1 Tahanan Party-list kapalit ni Nathaniel Oducado na nagbitiw sa puwesto ngayong buwan.
Ayon kay Commission on Elections o Comelec chairperson George Garcia, umakyat si Catulpos bilang kinatawan matapos ding magbitiw ang ikalawa at ikatlong nominees ng party-list.
Si Catulpos ay kasalukuyang presidente at chief executive officer ng Brigada Group of Companies na nangangasiwa sa mga FM radio station, TV network, botika, at security agencies sa iba’t ibang bahagi ng bansa.
Nagsilbi rin siyang presidente ng General Santos City Chamber of Commerce at naging bahagi ng Philippine Red Cross at Rotary International.
Noong Mayo 19, nagbitiw si Oducado kasama si Franz Legazpi, na kalaunan ay pinalitan ng kanyang kapatid na si dating National Youth Commission commissioner-at-large Karl Josef Legazpi.
Kabilang sina Oducado at Franz Legazpi sa 257 miyembro ng Kamara na bumoto pabor sa impeachment ni Vice President Sara Duterte.
Sa kanyang social media post, sinabi ni Oducado na personal na dahilan, kabilang ang kanyang kalusugan at pamilya, ang nagtulak sa kanya upang magbitiw sa puwesto.
Samantala, sinabi naman ni Garcia na normal lamang ang mga pagbibitiw sa hanay ng mga party-list representatives.
Ayon sa opisyal, karaniwan nang may mga miyembrong umaalis o nagpapalit sa mga party-list organizations.
