NAGA CITY – Nagpuon na an mga aktibidades na pigkokondusir para sa month long celebration kan PWD month ngunyan na bulan sa syudad nin Naga.
Sa nagin paghampang sa mga kagawad kan media ni Naga City Administrator Elmer Baldemoro, sinaysay kaini na sa maabot na Hulyo 29 magkakaigwa nin PWD congress o pagtiripon kan gabos na sektor kan mga PWD asin mga stakeholders.
Obheto kaini an tanganing pag-urulayan an PWD code asin an mga nakapalaog sa mga existing ordinance manunungod sa mga benipisyo, programa asin mga aktibidad na piggigibo para sa mga Person’s with disability.
Sa siring na paagi matatawan nin oportunidad an mga ini na magin parte an saindang sentimiento asin opinyon asin kun ano pa an pupwedeng magin dalan tanganing ma-improve pa an mga programa kan lokal na gobierno kan Naga para sa sainda.
Katakod kaini, an magigin culminating activity kaini an PWD wedding o pagkasal sa mga Persons with disabilities na haloy naman na nag-iibahan alagad dae pa naiikasal.
An nasambitan man na aktibidad an magseserbing dalan tanganing maikasal na an mga ini na karaniwang rason an huli sa kakulangan kan budget pambayad sa gastuson.
Magigin libre naman an mga bado asin reception para sa sainda na magigin dakulang bagay man ini para sa sainda orog na sa mga igwa na nin aki na dae pa nalilegitimize an pangaran huli ta dae pa sinda kasal.
