Nagpatanid an Department of Labor and Employment (DOLE) sa mga job seeker kontra sa pekeng alok na trabaho asin financial scams ngunyan na graduation season nanaman.
Pigrurumdom ni DOLE Sec. Bienvenido Laguesma na sa nakalihis na 2 taon, ginamit kan mga scammer an ladawan ni Presidente Ferdinand Marcos Jr. tanganing ipromote an pekeng tabang pinansiyal sa irarom kan programang pangkabuhayan kan DOLE na Tulong Panghanapbuhay sa Ating Disadvantaged/Displaced Workers (TUPAD).
Katakod kaini, sinaysay kan sekretaryo na apwera sa padagos na information dissemination sa paagi kan telebisyon, radio asin social media, nakikipag-koordinar na man sinda sa Department of Information and Communications Technology (DICT) asin law enforcement agencies nin huli ta sinda an igwa nin responsibilidad sa prosecution asin enforcement.
Sa parte man kan DOLE, tatawan soboot ninda nin inputs an kaukulang ahensiya. Pinapakusog na man kan ahensiya an information technology infrastructure kaini tanganing malabanan an cyberthreats.
