Ginatos na mga kababaihan na nakasulot nin kulay rosas an nagprotesta sa Jakarta, Indonesia kan nakalihis kasuodma, Miyerkules komo pagtutol sa kadahasan kan pulisya asin mga labi na benepisyo kan mga lehislador.
Bitbit pa kan mga ini an mga sighid na nagsisimbolo sa pangapodan na halion an ati kan estado asin pakusugon an pwersa kan seguridad.
Biribitbit man ninda an mga placard na igwang mensaheng siring kan “Reform the police” asin “Your sweet promises cause diabetes”.
Sigun sa Alliance of Indonesian Women, obheto ka hiro protesta na ipahiling na an kadaklan sa mga demonstrasyon iyo an matoninong.
Marurumdumang nagsiklab an mga protesta sa nasyon makalihis na mabunggo kan pulis vehicle an sarong food delivery moto-driver kan nakalihis na domingo na nagin mitsa kan mas mahewas na hiro protesta sa bilog na nasyon.
Sigun sa mga grupo kan karapatang pantao, 10 katawo na an binawian nin buhay huli sa padagos na pagsiklab kan kariribokan sa nasyon.
Mientrastanto, nagpasiring na man si Indonesian President Prabowo Subianto sa China tanganing mag-atendir sa sarong military parade.
Enot na ini kaining pigkanselar huli sa kariribokan, alagad idinagos kan mahiling na soboot nagbebweltada sa normal an sitwasyon.
Sa ngunyan, nag-iimbestigar na an National Commission on Human Rights, mantang nangangapodan an United Nations kan masusisng imbestigasyon sa soboot paggamit kan labi na dahas kan mga otoridad.
