NAGA CITY- Padagos an mga lakdang na pigbibilog kan Philippine National Railways katabang an lokal na gobierno kan Naga tanganing malikayan an mga nairerehistro na aksidente sa tren partikularmente sa rutang Naga pasiring Albay.
Sa nagin paghampang sa mga kagawad kan media ni Naga City Councilor Joe Perez, sinasaysay kaini na dae pa soboot sanay an tawo orog na sa mga lugar na pinag-aagihan kan rutang Naga-Albay kun kaya igwang naikukurit na mga aksidente asin minsan pigdadaklag asin igwa pang nagkukurahaw mantang nag-aagi an tren.
An mga tawo an dae pa soboot disiplinado kun ikukumparar sa rutang Naga-Sipocot.
Sigun pa sa opisyal, kadakol an nabaguhan sa pag-bwelta liwat kan rutang Naga pasiring Albay kaya dae nalilikayan an mga aksidente.
Sa ibong na lado, pigtawan duon man kan konsehal na igwang pangangaipuhan na mapakarhay pa an serbisyo kan PNR orog na an pagbwelta kan rutang Manila-Bicol nin huli ta dakula ining katabangan para sa mga commuters na naglilikay sa gabat kan trapiko asin sa mga nagmamadali sa paglaog sa saindang trabaho.
Apwera pa digde, an pagbwelta kan PNR-Bicol an makakatabang sa pag-uswag kan turismo asin pagpapa-angat man kan lokal na ekonomiya.
Sa ngunyan, nagpagirumdom na sana si Perez sa mga residentes na an mga harong an harani sa pig-aagihan kan tren na maglikay asin magin disiplinado tanganing malikayan an pagbungkaras kan mga aksidente.
