Dapat na maenot an mga lehislador sa lifestyle check na ipinagsugo ni Presidente Ferdinand Marcos Jr.
Ini an pighurot ni Presidential Sister Senadora Imee Marcos makalihis an kontrobersiya asin imbestigasyon sa maanomalyang flood control projects.
Sigun ki Marcos, komo lider kan nasyon, dapat sinda an mangenot sa direktiba kan Presidente na lifestyle check sa mga opisyal kan gobyerno. Sigun pa ko Senadora Imee, bukas man ini na iluwas an saiyang Statement of Assets, Liabilities, and Net Worth (SALN) huli man ta public document man an mga ini.
Apwera pa sa lifestyle check, dapat man na imbestigaran an negosyo asin dapat na igwa nin makulong. Mientrastanto, sa pulong-balitaan, preparado man si Senadora Risa Hontiveros na magsairarom sa lifestyle check asin magluwas kan saiyang Statement of Assets, Liabilities, and Net Worth (SALN).
Ini an tangani maipahiling an saiyang middle-class na estilo kan pamumuhay. Nagtutubod si Hontiveros na makakatabang an lifestyle check tangani man mabawasan an talamak na katiwalian sa paggamit nin public fund para sa mga proyekto kan gobyerno.
Enot man na nagpahayag nin suporta an liderato kan Senado sa kasuguan kan nasambitan ng Presidente na lifestyle check.
Hurot ni Senate President Francis Escudero, may malinaw na basehan an Presidente tangaani ipautob an siring man na lakdang. Tinukoy kaini an Article XI, Section 1 kan 1987 Constitution na nagsusugo sa mga lingkod-bayan na magin tapat asin responsable sa saindang tungkulin, mamuhay nin simple, asin magsirbi nin may integridad.
Pigtawan duon man kaini an Section 8 kan Republic Act 3019 o Anti-Graft and Corrupt Practices Act na nagsasaad nin pag-dismiss sa mga opisyal na dae makapagpaliwanag kan saindang yaman, pati na an Republic Act 1379 o Forfeiture Law na nagtatao nin kapangyarihan sa gobyerno na kumpiskaron an mga ilegal na nakuang ari-arian.
Dugang pa kaini, binanggit man kan senador an Section 4(h) kan Republic Act 6713 o Code of Conduct and Ethical Standards for Public Officials and Employees na mahigot na nagbabawal sa mga opisyal asin saindang pamilya na magpakitang-yaman.
Mientrastanto, pighurot man ni Senate Deputy Majority Leader JV Ejercito na panahon na tangani ipautob an mas mahigot na lifestyle check sa mga opisyal kan gobyerno, orog na sa Department of Public Works and Highways (DPWH), makalihis magluwas an report na pirang empleyado kan ahensya an igwa nin mga mamahaling lunadan asin luho na dae man tugma sa saindang sweldo.
