NAGA CITY – Mayo na nin nairehistro asin na determina na mga karne na positibo sa African Swine Fever sa mga slaugther house sa enterong Bicol Region.
Sa nagin paghampang sa mga kagawad kan media ni Dr. Alex Templonuevo, NMIS-Bicol Regional Technical Director, sinaysay kaini na an natatada na sana an lingering virus kan ASF na malusot pasiring sa sarong lugar pasiring naman sa iba pa.
Tinawan duon man kaini na dapat an Regulatory Section na kan DA an mag monitor asin magtaong advise sa mga LGU huli ta luwas naman ini sa saindang hurisdiksyon. Karaniwan man soboot na an nagigin kawsa kan paglakop kan mga siring na helang an gikan sa mga slaughter house na kun sain digdi man nadedetect na igwa talaga nin kaso sa mga LGU.
Komo parte man kan protocol, enkaso mahiling na igwa nin kaso kan helang sa sarong slaughterhouse, otomatiko ining ipapasarado sa laog kan pitong aldaw.
Magkakaigwa man nin disinfection and cleaning sa lugar tanganing masierto na mayong na talaga an virus sa lugar asin dae na ini makakalakop pa.
Saro man sa mga pinagkakahandalan kan ahensya an pag travel kan mga meat products magin an mga processed na huli ta dipisilon na ining lapagon.
Katakod kaini, hurot ni Templonuevo na antes na makapagbyahe an sarong byahero an dapat na hilingon muna asin pagbawalan na magdara nin mga siring na processed meat products.
Sa ngunyan, magpapadagos man an pagbabantay kan saindang ahensya sa na kamugtakan tanganing masierto na dae na liwat na makakalakop pa an ASF sa rehiyon.
