NAGA CITY– Ikokondusir ngonyang aldaw kan Mines and Geosciences Bureau (MGB) Bicol an pag-inspeksyon sa Barangay Sipaco, Lagonoy, Camarines Sur na nairehistro an sarong landslide kan nakaaging semana.
Sa entrevista kan Bombo Radyo Naga ki Engr. Guillermo Molina, Regional Director kan MGB-Bicol, sinaysay kaini na mapasiring sa lugar an saiyang kabuhan asin an representante hale sa Provincial Environment and Natural Resources Office (PENRO) para maaraman kun igwa nin iligal na pagmimina rito na posibleng nagin rason sa nangyaring pagrasay nin daga.
Marurumduman na binawian nin buhay si Darwin Bermerjo, 53-anyos makalihis na mailubong nin buhay kan matabunan nin nagrasay na daga sa nasambitang Barangay.
Mientrastanto, sigon ki Molina, posibleng mahampang sa maninigong kaso an mga Barangay Officials kun enkaso mapatotoohan na dae an mga ini naggibo nin lakdang para maipauntok an iligal na aktibidad sa nasambitang lugar.
