Nagtatao nin bagong angat an padagos na paglangkaw kan presyo kan mga produktong petrolyo sa mga proyekto sa imprastraktura kan syudad nin Naga.
Sa pahayag ni Naga City Mayor Leni Robredo, sinaysay kaini na base sa monitoring kan syudad piglalaoman na maabot sa poco mas o menos ₱2.00 hasta ₱4.00 kada litro an presyo kan gasolina asin iba pang produktong petrolyo. Dawa na nagtitinir na bastante an suplay, an paglangkaw kan presyo nagigin kawsa nin dugang na gastos sa mga kontratista, na iyo an nagigin kawsa kan paglangkaw kan saindang mga singil sa proyekto.
Sa ibong na lado, nagtitinir na fixed an budget kan City Government para sa mga proyekto, na nagreresulta sa kakulangan nin pondo asin posibleng atraso sa implementasyon. Huli kaini, an ibang mga kontratista habo nang magpartisipar sa bidding, lalo na kung an itinalaan na presyo dae na nababagay sa presenteng gastos.
Kabali sa mga apektadong proyekto iyo an nagkapirang importanteng inisyatiba kan Department of Public Works and Highways, arog kan esplanade puon sa Tabuco Bridge pasiring sa San Francisco, siring man an nagkapirang proyekto sa pagbukas kan tinampo. Huli sa kakulangan nin bidders, pigrekomendar kan DPWH an paramientras na pagsuspinde kan mga nasabing proyekto.
Mientrastanto, kasunod kan exit conference kan Commission on Audit, pigbisto kan gobyerno kan syudad an problema sa decentralized procurement bilang saro sa mayor na kawsa kan Audit Observation Memorandums (AOM).
Komo simbag, pigtutulod kan administrasyon an pagtogdok nin sarong sentralisadong bodega kan syudad. Ini nagmmawot na mapakarhay an sistema nin pagkua asin pamamahala kan mga suplay, maparikas an proseso nin pag-audit, asin maibitaran an kaparehong mga isyu sa masunod na pag-audit.
Dugang pa ni Robredo na an sentralisadong sistema piglalaoman na makakatabang sa pagmantenir kan inventory order, paglangkaw kan transparency, asin pagdagdag kan overall efficiency sa project management.
Padagos man na pigbabantayan kan lokal na gobyerno an hiro kan presyo kan langis asin an epekto kaini sa mga basic commodities, mantang naghahanap nin mga lakdang tanganing mamantenir an padagos na pag-uswag kan syudad sa ibong kan mga angat.
