NAGA CITY- Dagsa sa presente an mga pig-aapod na migratory birds sa Cabusao Wetlands Critical Habitat Barangay Pandan sa banwaan kan Cabusao, Camarines Sur.
Sa entrevista kan Bombo Radyo Naga ki Abner Avizola, Wildlife Enforcement asin Municipal Tourism Officer kan LGU-Cabusao, sinaysay kaini na taon-taon soboot nagbibisita an mga nasambitan ng 34 o labi pa na klase kan migratory birds sa saindang lugar.
Katakod kaini, sigun ki Avizola, igwa man peligro na naitatao sa tawo an mga ini nin huli ta posibleng carrier kan bird flu an mga nagdadayong klase kan gamgam sa saindang banwaan.
Huli digde, pig-abisuhan kan opisyal an publiko na dae pagkaputan an mga nasambitan ng migratory birds orog na an mga nagadan na huli ta posible soboot igwang makuang helang digde.
Apwera digde, igwa naman narereseber na reklamo an saindang opisina gikan sa mga paraoma na pigkakakan an saindang mga tanom nin huli ta bako sana sa mga shoarline makukua o mahihiling an mga migratory birds kundi magin sa mga omahan.
Dugang pa ni Avizola, puon bulan kan Setyembre nanunutaran na an presensiya kan mga migratory birds sa saindang banwaan huli abundant sa pagkakan an Cabusao na binalik-balikan kan mga gamgam.
Sa ibong na lado, apwera sa mga mararaot na epekto kan pagdagsa kan mga migratory birds, igwa man soboot ining karahayan na madadara nin huli ta nakakatabang ini sa turismo sa saindang banwaan.
Sa ngunyan, padagos man an pigsasagibong lakdang kan LGU-Cabusao katabang an DENR tanganing masierto na napoproteheran an mga nasambitan ng migratory birds kontra sa mga mapang-abusong mga tawo.
