NAGA CITY – Passable naman an gabos na agihan sa parte kan Sagñay, Camarines Sur makalihis na magkaturumba an nagkapirang puon kan kahoy sa nagkapirang lugar huli sa makusog na uran na naseksperyensyahan sa lugar kan mga nakalihis na oras.
Sa entrevista kan Bombo Radyo Naga ki Noli Pielago, Municipal Disaster Risk Reduction Officer kan Sagñay, Camarines Sur, sinaysay kaini na tolos man na nalinig kan Department of Public Works and Highways an mga natumbang kahoy.
Mientrastanto, tolos man sindang nag-abiso sa mga parasira na likayan na muna an paglalawod huli sa maraot na kamugtakan kan panahon.
Katakod kaini, padagos man an saindang koordinasyon sa mga barangay tanganing masierto na gabos an nagsusunod sa mga panundunan na saindang pigpapautob na igwa nin kinaaram sa epektong dara kan Bagyong Carina sa saindang probinsya. Nagpapadagos man an saindang monitoring orog sa mga baybayon asin mga salog sa saindang banwaan.
Naka standby naman an saindang mga personahes tanganing magtaong asistensya enkaso kinakaipuhan.
