Aram baya nindo mga ka bombo nabugtak sa peligro an buhay kan sarong motorcycle rider kan kadikit pa ining tangayon kan nagraragasang tubig sa salog sa Davao City kun saen an motorsiklo kaini, an dae man nakasalbar.
Basado sa report, mahihiling sa video footage na pirit na pigbabalyo kan rider sa nagraragasang tubig sa salog lunad kan saiyang motorsiklo.
Dae na kaini kinaya an agos asin natumba an rider.
Sa ibong kaini, pirit pighahatak kan rider an saiyang motor tanganing dae atungon o tangayon kan agos alagad talagang makusog an tubig asin nabutasan kaini antes pa makaabot sa pampang.
Dinara kan agos an motorsiklo sa pababang parte kan salog
.
Sigun sa rider, nagmamadali ini makapuli kaya pigpipirit na makabalyo sa salog.
Sunod nang aldaw nahiling an tinangay na motor asin nakua gamit an backhoe.
Pasakitan man sa nagkapirang residentes asin paratukdo an pagbalyo sa salog sa Senator Ninoy Aquino, Sultan Kudarat kawsa kan mayong untok na uran.
Nagkaaberya man an pirang nagbalyo sa salog gamit an saindang motorsiklo kan laugon nin tubig an makina
Mientrastanto, dae man nagpapugol an sarong pamilya na magselebrar nin kaaldawan kan saro nindang mahal sa buhay sa ibong kan perwisyong kawsa kan raot nin panahon.
Nagmistulang pool party kan laugon nin tubig an harong kan birthday celebrant asin pigtaas na sana kan mga ini an saindang mga gamit.
