(UPDATE) NAGA CITY- Inaaram pa ngonyan kan manhamiento kan 9th Infantry Division, Philippine Army an totoong pagkakabistuhan kan miyembro kn rebeldeng New People’s Army (NPA) na binawian nin buhay sa nangyaring engkwentro sa Lagonoy, Camarines Sur.
Sa pakikipag-olay kan Bombo Radyo Naga ki Capt. Joash Pramis, pamayo kan Division of Public Affairs Office (DPAO), sinaysay kaini na igwa sindang naresibeng impormasyon na igwa suboot halangkaw na posisyon sa kilusan si Alyas Kanik.
Dae pa man masierto kan mga militar kun sarong NPA Leader an nasambitang lalaki na saro suboot sa saindang mahigot na pigbantayan.
Napag-araman na nagsapo nin tama sa saiyang payo asin manlaen laeng parte kan lawas an nagadan na miyembro kan rebeldeng NPA.
Marurumduman na nagadan si Alyas Kanik makalihis an nangyaring engkwentro sa pag-ultanan kan mga militar asin rebeldeng NPA sa Barangay Pinamihagan sa nasambitang banwaan na naghaloy nin haros 30 minuto.
Nakumpiskar sa pinangyarihan kan bakbakan an apat na manlaen laeng klase nin badil, sarong granda asin mga dokumento.
