Balik normal operasyon na an kadaklan sa mga palupadan sa irarom kan Civil Aviation Authority of the Philippines (CAAP) makalihis an panlalamasa kan Super Typhoon Uwan.
Sigun sa ahensiya, mayong naikurit na dakulang danyos sa mga palupadan. Sa inisyal na inspeksiyon, natukoy na limitado sana an danyos sa nagkapirang atop, kisame, glass panels, asin bakod.
Igwang mga lugar na nakaeksperyensiya kan pagbaha asin paramientras na pagkawara kan kuryente asin komunikasyon.
Apwera digde, piglangkaw pa man giraray an flight advisories sa mga palupadan kan Bicol International Airport, Masbate, Naga, Virac, Daet asin Cauayan.
Bukas na man an Baguio Airport alagad nagtitinir na suspendido an Visual Flight Rules (VFR) huli sa maluyang visibility dara kan padagos na pag-uran.
Mientrastanto, nagtitinir na suspendido an operasyon sa mga palupadan kan Bulan, Bacon, Sangley, Plaridel, Iba, asin Subic.
Sigun ki CAAP Director General Ret. Lt. Gen. Raul Del Rosario, prayoridad pa man kan ahensiya an kasalbaduhan kan mga pasahero asin mga personahes.
Pig-omaw man kaini an marekas na kasimbagan kan mga airport asin emergency teams sa epekto kan bagyo.
Padagos an piggibong monitoring kan ahensiya asin nangapodan sa publiko na sunodan an mga opisyal na abiso para sa mga pinakabagong update.
