NAGA CITY – Maabot sa 30 kaharungan an nadanyaran kan panlalamasa kan buhawi sa duwang banwaan sa Camarines Sur.
Enot digdi, pasado ala 1:30 nin hapon kasuudma kan mamatean an makusog na bulos kan uran sa manlaen laen na parte kan probinsya kunsaen duman na nagpuon na mabilog an buhawi na enot na nanlamasa sa Canaman.
Sa entrevista kan Bombo Radyo Naga ki Alvin Dela Rosa, Officer 1 kan Municipal Disaster Risk Reduction and Management Office (MDRRMO)-Canaman, sinaysay kaini na sentro kan buhawi an Barangay Palo kunsaen 13 mga harong an nadanyaran.
Apwera digdi, sarong harong man an dikitan pang masulo makalihis maputol an linya kan kuryente sa lugar.
Mentrastanto, apwera sa Canaman, inagihan man kan buhawi an duwang barangay kan Libmanan.
Sigon ki Rowel Tormes, MDRRMO Head kan Libmanan, duwang harong an totally damage sa barangay Malansad Viejo asin 14 iba pa an gikan naman sa Mambulo Viejo.
Katakod kaini, nagtinir muna sa evacuation centers an mga apektadong pamilya gikan sa nasambitan ng mga lugar.
