Magsasagawa ng legal na aksyon ang National Bureau of Investigation (NBI) laban sa mga nasa likod ng isang pekeng online post na maling nag-aangkin na binatikos ni NBI Director Melvin Matibag ang Iglesia Ni Cristo (INC).
Ayon sa NBI, walang katotohanan ang kumakalat na social media post at hindi kailanman naglabas ng naturang pahayag si Director Matibag. Binigyang-diin ng ahensya na gawa-gawa lamang ang nilalaman ng post at layunin umano nitong magpakalat ng maling impormasyon at iligaw ang publiko.
Sinabi ng NBI na nagsimula na ang kanilang imbestigasyon upang matukoy ang mga indibidwal o grupong responsable sa paggawa at pagpapakalat ng naturang pekeng impormasyon. Kabilang sa sisiyasatin ng ahensya ang pinagmulan ng post, gayundin ang mga account na unang nagbahagi nito sa iba’t ibang online platforms.
Babala ng NBI, maaaring maharap sa kaukulang kasong kriminal ang mga mapatutunayang sangkot sa paggawa at pagpapakalat ng fake news, lalo na kung napatunayang may layuning manira ng reputasyon, maghasik ng maling impormasyon, o lumabag sa umiiral na mga batas sa cybercrime at iba pang kaugnay na batas.
Muling hinikayat ng NBI ang publiko na maging mapanuri sa mga impormasyong nakikita sa social media at tiyaking mula sa mga opisyal at mapagkakatiwalaang sanggunian ang mga balitang kanilang ibinabahagi upang maiwasan ang pagkalat ng maling impormasyon.
