Pig kumpirmar kan National Bureau of Investigation (NBI) an pag-arestar sa tulong indibidwal na soboot pasikreto na nag angkat nin Uranium asin ilegal na pigpapabakal sa nasyon.
Segun sa mga awtoridad, nadakop an duwang indibidwal na sinda Mae Vergel Zagala alyas “Madam Mae” asin Arnel Gimpaya Santiago sa entrapment operation sa Pasay, City kan nakalihis na Oktubre 18, 2024 asin nahilingan sinda nin nasa 20 kilogram na mga metals asin 3 kilograms na black powder, gabos soboot nag-positibo sa Uranium-235 asin Uranium 238.
Pirang aldaw makalihis na sinda madakop, naarestar naman si Roy Vistal, partner ni Zagala, sa Cagayan de Oro.
Katakod kaini, nadiskubre man kan Philippine Nuclear Research Institute (PNRI) an lugar kun saen nadakop an tulo na kontaminado nin Uranium powder kaya man presente ng nasa proseso nin decontamination an lugar antes ini bukasan liwat para sa publiko.
An Uranium, sarong klase nin heavy metal na pwedeng magamit sa paggibo nin mga bomba asin panangga. Alagad, igwa man na darang banta sa salud an sisay man na mang ma-expose sa nasambitan ng klase kan metal.
Maatubang an tulong na aretar sa kasong pagbalgar sa Republic Act No. 5207 o Atomic Energy and Liability Act of 1968.
