Inilangkaw kan National Food Authority (NFA) an buying price kan malinig asin mara na palay sa Camarines Sur asin Camarines Norte sa ₱28 kada kilo, epektibo poon Oktubre 5 hasta Oktubre 11. Katuyohan kan lakdang na matawan nin mas marahay na kita an mga paraoma asin ma-engganyar an mga ini na ipabakal an saindang produkto sa NFA.
Sa intrevista kan Bombo Radyo Naga kay Jennilyn Celestial – Branch Manager, National Food Authority – Camarines Sur, an lakdang na ini parte kan preparasyon kan ahensya sa piglalaoman na epekto kan El Niño, na posibleng magin kawsa kan pagbaba kan produksyon kan palay sa mga probinsya. Sinabi niya na an NFA an maserbing andam na merkado para sa mga paraoma na nangangaipo nin seguradong lugar na maipabakalan kan saindang mga ani.
Piglinaw kan NFA na an ₱28 kada kilo para sa malinig asin alang na paroy, mantang posibleng magkaiba-iba an aktwal na presyo depende sa kalidad, moisture content asin kalinigan kan produktong pigdeliver. Handa man daa an ahensya sa pondo, logistics asin warehouse capacity tanganing makabakal pa nin palay sa mga paraoma.
Target kan NFA na makabakal nin maabot sa 450,000 na sako nin paroy ngonian na ikaduwang semestre o main crop harvest season. Mientrastanto, uminabot na sa 470,000 na sako an rice inventory kan NFA sa Camarines Sur asin Camarines Norte, na piglalaoman na maproseso tanganing magserbing buffer stock sa panahon kan El Niño asin iba pang kalamidad.
Inenkaminar ni Celestial an mga paraoma na aprobetsaran an mas halangkaw na buying price asin makipag-ulay sa NFA. Padagos man an programa kan ahensya na ₱20 per kilo rice para sa mga konsumidor, bilang parte kan lakdang kan gobyerno na papagdanayon na abot-kayang bakalon an bagas sa ibong kan huma nin pagbaba kan produksyon.
