Pigsierto sa ibong kan padagos na paglangkaw kan presyo kan mga produktong petrolyo, kan Philippine Red Cross na nagdadanay na stable an saindang operasyon, partikular na sa supply nin dugo.
Sa intrevista kan Bombo Radyo Naga ki Maria Felisa Badiola (Chapter Administrator, Philippine Red Cross – Camarines Sur Chapter), saiyang sinabi na, dawa ngani igwa nin nagkapirang pagbabago sa saindang pang-aroaldaw na trabaho, dae man giraray naapektaran an supply nin dugo kan saindang opisina. Segun ni Badiola na padagos an saindang pakikipagkoordinar sa manlaen-laen na partner organizations tanganing maseguro na igwa nin magkakanigong supply nin dugo para sa mga nangangaipo.
Idinagdag pa kaini na posibleng magkaigwa nin pagbabago sa mga singil na may relasyon sa serbisyo sa dugo, susog sa mga regulasyon kan Department of Health. Alagad, pighahalat pa an opisyal na anunsyo manungod digdi.
Sa isyu kan operasyon, aminado an opisyal na apektado an saindang gastos sa gasolina, urog na sa pagresponde asin pagbyahe kan saindang mga behikulo. Sa ibong kaini, padagos man giraray an saindang serbisyo bilang humanitarian organization na andam na magresponde 24 oras kada aldaw sa anuman na pangangaipo.
Mientrastanto, nagdadakul suboot an bilang kan mga indibidwal na boluntar na nagdodonar nin dugo. Padagos man an mga aktibidad sa pag-bloodletting asin inaako man an mga walk-in donors. Sa nagkapirang kaso, an iskedyul kinaipuhan na i-adjust huli sa supisyenteng suplay nin dugo.
Dai man suboot apektado an saindang training para sa mga volunteers. Sa katunayan, dinagdagan ninda an saindang mga kagamitan, kaiba an sarong advanced mannequin na ginagamit sa pagsasanay sa CPR na may real-time na feedback, siring man an sarong oxygen concentrator na pwedeng gamiton nin padagos.
Bilang preparasyon sa Semana Santa, nagbugtak man nin mga first aid stations an organisasyon sa mga simbahan asin matawong lugar. Igwa man nin mga ambulansya asin mga volunteers na naka-standby tanganing magresponde sa mga posibleng insidente. Sa ngunyan, pigkakarkulong nakadeploy sinda nin 20 hasta 25 na mga volunteers.
An mga menor de edad na kaso arog kan dehydration asin pagkadismayo iyo an komun na nairerecord sa Semana Santa, kun kaya pinapagiromdom an publiko na atamanon an saindang salud, likayan an mga matawong lugar kun kinakaipuhan, asin magin andam sa anuman na sitwasyon.
Pig-enkaminar kan opisyal an gabos na magin maingat, responsable, asin papagdanayon an espiritu nin pagtarabangan sa tahaw kan mga angat na kinakahampang kan nasyon.
