NAGA CITY– Pinangaranan na ngunian kan pamilya kan babaeng ginadan asin inapon sa gilid kan tinampo sa San Fernando, Camarines Sur an pading pigtutubudan nindang nasa likod kan pagkagadan kan biktima.
Sa ekslusibong entrevista kan Bombo Radyo Naga ki Vivincia Rapiñan, ina kan 28-anyos na si Jeraldine, ibinuyagyag kaini na haloy na soboot na may relasyon an saiyang aki asin an pading si Father Paul Tirao, Parish Priest kan Parish of St. Anthony of Padua sa banwaan kan Siruma.
Sigon ki Rapiñan, haros sampulong taon na soboot na nagtatrabaho sa harong kan nasambitan ng padi an saiyang aki.
Naaraman sana soboot niya na igwa nang relasyon an duwa kan mabaritaan niya na bados na an saiyang aki asin an pigtutukdong ama iyo an mismong padi.
Kan mangaki si Jeraldine, si Fr. Tirao man soboot an nagtatao nin sustento sa saiyang aki asin apo.
Dugang pa kaini, an nasambitan ng padi soboot an katagpuan ni Jeraldine antes ining nawara para kuanon kuta na an kwartang pampabunyag sa saindang aki.
Alagad dawa dae masabi sa ngunian ni Rapiñan kung tano ta an nasambitan ng padi an pigmimirar ninda komo prime suspect sa krimen, sinaysay kaini na mayo man nin ibang nakarelasyon an saiyang aki.
Marurumduman na Hunyo 14, pasado alas-5 nin hapon kan bayaan soboot ni Jeraldine an limang bulan na aki sa saiyang pinsan sa banwaan nin Baao para magkua nin kwarta para sa bunyag kaini alagad dae na nakabwelta pa.
Kinaagahan, nadukayan na sana an lawas kan biktima na mayo na nin buhay sa gilid kan tinampo sa banwaan kan San Fernando.
Sa ngunian, nagsayuma muna na magkomento sa impormasyon an kampo ni Fr. Tirao siringman an Archdiocese of Caceres na enot nang pigsierto na nagsasagibo na soboot nin suway na imbestigasyon.
