Pig-enkaminar kan gobyerno kan Japan an mga Pilipino na mag-adal kan Japanese o Nihongo tanganing mas mapadakul pa an saindang oportunidad sa trabaho sa nasabing nasyon.
Ginibo an pahayag pagkatapos makompleto kan ika-18 batch kan mga Pilipinong nurse asin certified care worker an Preparatory Japanese Language Training (PJLT) sa irarom kan Japan-Philippines Economic Partnership Agreement (JPEPA).
Binibilog an batch nin 211 kandidato—17 na nurse asin 194 na care worker—na nakabiyahe na pa-Japan.
Pag-abot sa Japan, masairarom pa sinda sa anom na bulan na masinsinang pagsasanay sa wikang Japanese antes magtrabaho sa mga ospital asin caregiving facilities.
Siring kan gobyerno kan Japan, makakatabang an pag-adal kan Nihongo tanganing mas magdakul an oportunidad sa trabaho kan mga Pilipino asin lalo pang mapatibay an relasyon kan Japan asin Pilipinas sa larangan kan healthcare.
